Omsendbriewe

OMSENDBRIEF 8 VAN 2020

KING PRICE BOLAND LANDBOU OESFEES 2020

Dankie! ’n Eenvoudige, opregbedoelde woord, maar tog heeltemal onvoldoende om die gevoel van dankbaarheid teenoor ons ouers, ondersteuners en seuns oor te dra vir hul bydrae om van die afgelopeKing Price Boland Landbou Oesfees ’n sukses te maak!

Dankie aan elke ouer wat finansieel, of met die gee van produkte, of met die opoffering van hul tyd om op die dag te werk, gehelp het.

Dankie aan die borge en ondersteuners wat omgee vir ons skool.

Dankie aan Annelize van Zyl, voorsitter van die OOV, en al haar helpers wat van Donderdagaand af
voorberei het vir die fees.

Pieter Theron wat die suksesvolle organisasie van die groentetafel behartig het - dankie daarvoor!

Dewald Vorster, asook almal wat lewende hawe of vleis geskenk het, het ‘n reusebydrae gemaak om vanjaar se vleistafel weer ’n sukses te maak - dankie!

Laastens, dankie aan ons seuns vir hul netjiese voorkoms, vriendelikheid en hulpvaardigheid.

Julle bly ons skool se beste bemarkers en julle het dit puik gedoen die afgelope naweek!

KING PRICE BOLAND LANDBOU OESFEES LOOTJIES
Die gelukkige wenners van die King Price Boland Landbou Oesfees lootjies is:

Eerste prys
Tweede prys
Derde prys
:
:
:
Manfred Williams
Erhardt Kilowan
Barnie en Nicoleen Pretorius

Geniet julle pryse. Irma Greyling

KLEREWINKEL : TYE VIR MAART/APRIL
Die dag as die skole heropen 31 Maart 2020 16:30 tot 17:30.
Vrydag 3 April 16:15 tot 17:00.
Saterdag 4 April 08:00 tot 11:30.
Kan ons ook net meld dat ons ongelukkig nie klere aan leerders kan oorhandig alvorens daar ‘n bewys van betaling is nie.

Tweede kwartaal

Dinsdae 16:45 - 17:30 tensy anders gereël
Tuiswedstryd Saterdae 08:30 - 11:00 Pierre Schoeman

MEJ BOLAND
Weereens baie dankie aan al ons borge, die deelnemers asook Soekie Nieuwoudt vir die décor van die aand. Ons waardeer dit opreg. Lizanne Ferreira

KING PRICE BOLAND LANDBOU OESFEES - ONTBYT
Baie dankie aan almal wat 'n bydrae gelewer het vir die ontbyt, op watter manier ookal. Dit word waardeer. Ons wil ook vir Lana-Mare Steyn en al haar helpers dankie sê wat hard gewerk het om van die ontbyt 'n sukses te maak. Marlette van Wyk

SPORT
RUGBY
Die afgelope Saterdag tydens die King Price Oesfees het ons o.19A & B-rugbyspanne hulle eerste wedstryde van die seisoen gespeel. Die o.19B-span het vir HTS Drostdy geklop maar ongelukkig teen Stellenberg verloor. Ons o.19A-span het baie goeie rugby gespeel en maklik met Tygerberg RVK en die
Hoërskool Brackenfell afgereken.

Dit was ook ‘n baie suksesvolle dag. Altesaam 28 spanne het deelgeneem.

Op Vrydag 6 Maart het ons weer ons jaarlikse laerskole rugbydag aangebied. 42 laerskool spanne regoor die Boland en WP het hieraan deelgeneem. Dit is ‘n uitstekende bemarkingsgeleentheid vir ons skool en die terugvoer wat ons elke jaar ontvang, is puik.

Op Dinsdag 10 Maart het ons o.19A-rugbyspan deelgeneem aan die jaarlikse WP Rugbydag op Nuweland. Ons het mooi rugby gespeel en klop vir SACS 20 – 5. Die span vertrek Saterdag 14 Maart na die Blou Bulle Rugbydag op Loftus. Ons speel om 18:40 teen HTS Middelburg. Die wedstryd word
regstreeks op Digitv uitgesaai.

Baie sterkte ook aan ons o.14A- en o.16A-rugbyspanne wat vandag deelneem aan die Brackenfell Sportdag. Die o.16A span speel om 16:00 teen Bellville op Brackenfell Rugbyklub se A-veld en die o.14Arugbyspan om 18:00 teen Durbanville op Brackenfell Rugbyklub se B-veld.
Oloff Bergh

TENNIS
Ruben Joubert het in die Eden Mini-2, wat in George gehou is, gespeel. Hy het in die seuns o.16-afdeling in die enkels in die finaal gespeel, maar ongelukkig verloor. Dus algeheel 2de, wat steeds uitstekend is. Hy en sy dubbelsmaat het ook tot die semi-finale gevorder waar hulle ongelukkig ook verloor het. Dankie
dat jy altyd Boland Landbou se naam hoog hou!
Johan van der Merwe

S J HARTMAN
SKOOLHOOF
2020-03-13