Omsendbriewe

OMSENDBRIEF 23 VAN 2018

INTERSKOLE 2018

Na afloop van hierdie geleentheid is dit werklik ʼn behoefte om dankie te sê aan elke Boland-familielid.  Dankie vir ondersteuning, opoffering en entoesiasme om van hierdie geleentheid ʼn sukses te maak.  “Niks wat die moeite werd is, kom sonder moeite nie” – baie dankie vir elkeen se moeite om dit die moeite werd te maak!  Vergun my ʼn spesiale dankie aan die OOV, hul voorsitter Mineke Fourie, en almal wat hierdie jaar in die kiosk gehelp het.  Dit het groot opoffering gevra, maar julle het dit vir ons skool gedoen.

Ons seuns is en bly ons trots!  Voortdurende opvoeding van geboorte af is nodig om sukses te bewerkstellig!  Ons mag nooit hiermee ophou nie. 

Ek is dankbaar vir die genade van Interskole 2018!  Ons kon alles presies dieselfde gedoen het en die uitslag en die dag kon anders verloop het.  Mag ons altyd nederig bly en hard bly werk om voort te bou op dit wat ons vermag het, omdat dit oor ons kinders se skool gaan!

Vrydagaand voor Interskole het ek die volgende vir die eerstespan gesê:  “It is when you forget about yourself, that you will do the things you will be remembered for!”.  Die hele Boland-familie het Interskole-naweek dinge gedoen waarvoor hulle onthou sal word!                              Chris Fourie

OOV

Ek wil net namens die OOV, aan elke liewe ouer wat Vrydagaande en Saterdagoggende, ons so getrou kom help het, BAIE, BAIE DANKIE sê!!

Sonder julle kan ons nie so ‘n suksesvolle snoepie bestuur nie.  Aan al die graad 12-ouers, ons gaan julle mis en hoop om jul volgende jaar weer met sportdae te sien.

Sterkte vir die res van die jaar.  Tot weersiens in 2019 by die Snoepie.                                                                                                                                                       Mineke Fourie, Voorsitter OOV

PRYSUITDELING - BEKERS

Sal al die leerlinge wat verlede jaar by die prysuitdeling bekers ontvang het, dit asseblief na die uitnaweek terugbring skool toe.  Maak asseblief seker dat dit duidelik gemerk is om verwarring te voorkom, bv. plak 'n papiertjie met jou naam en waarvoor jy die beker ontvang het, binne-in.  Ons sal dit waardeer as dit skoon terugkom.  Julle kan dit Maandag gedurende registerperiode by ontvangs ingee.                                                                                                                                Ronél Bernardo

MNR BOLAND

Een van die hoogtepunte tydens die Interskole-week, is die kies van Mnr Boland.  Baie geluk aan Philip Niemand (Mnr Boland 2018), Louis-Dirk Human (2de) en Dean Reichert (3de).  Armand Adendorff is aangewys as Mnr Persoonlikheid.

Ons wil net vir Eureka en Willem du Toit en hul span bedank vir die pragtige décor wat hulle verskaf het.  Wees verseker dat die seuns dit baie waardeer het.                                        René Bester Felder

SKOOLFONDS EN LOSIESGELDE

Baie dankie aan elke ouer wat getrou skoolfonds en losies betaal.  Almal van u wat nog nie klaar betaal is vir die jaar nie, sou hierdie week rekeningstate ontvang het.  Vergewis u asseblief daarvan en ons versoek u om te sorg dat u op datum betaal is.  Ons maak staat op u vriendelike samewerking.

JAARBLAD

Die jaarblad dien elke jaar as ʼn vertoonvenster vir Boland Landbouskool en stel al ons aktiwiteite op ʼn besondere manier voor.

Ons gee ouers die geleentheid om ʼn bladsy in die boek te borg.  Ons soek ouers wat bereid is om ʼn bladsy teen R500/bladsy te koop.  Dit beteken dat ons die naam van die ouers en die leerder aan die onderkant van die bladsy aanbring as erkenning van u bydrae.

Dit sal soos volg daar uitsien:

Piet en Annie Alberts: Jannie Alberts 11A

Albei of een van die ouers se name kan aangebring word.

Indien u belangstel, kan u die bladsy bespreek deur te e-pos na This email address is being protected from spambots. You need JavaScript enabled to view it. of Sandra te kontak by 021-869 8143.  Die geld kan in die skool se rekening (ABSA 400 390 304) betaal word met u naam en jaarblad as die verwysing.  Sluitingsdatum is 16 Oktober 2018.  Ons hoop u sal die inisiatief ondersteun.                                                                                                Johan van der Merwe

RUGBY

UITSLAE

BOLAND LANDBOU vs OAKDALE

SATERDAG 18 AUGUSTUS 2018

SPAN

TELLING

SPELER VAN DIE WEDSTRYD

o.14C

             0 – 12

De Wet du Toit

o.14B

             7 – 5

NJ Gilmore

o.14A

           24 – 15

Angelo Daniels

o.15D

           21 – 17

Philip Theron

o.15C

           10 – 17

Armand Marais

o.15B

           14 – 27

Dawie Pansegrouw

o.15A

             3 – 47

Emile Geyser

o.16C

             3 – 23

Arno Haasbroek

o.16B

             3 – 17

Wian Smit

o.16A

           25 – 25

Luhan Steyn

o.19F

           24 – 0

Ruan Visser

o.19E

           10 – 13

Charl Hesse

o.19D

             5 – 29

Wian Moggee

o.19C

             8 – 21

Phillip Falck

o.19B

           17 – 26

Armand Adendorff

o.19A

           56 – 19

Gavin Mills

 

CHRIS FOURIE

2018-08-24